РОДНЫЯ ВОБРАЗЫ Вобразы мілыя роднага краю,               
Смутак і радасьць мая!..
      
 
Якуб Колас
    Галоўная      Слоўнікі      Гасьцёўня      Спасылкі      Аб сайце       Кірыліца      Łacinka    
Янка Купала
Вершы
Кантэкстны тлумачальны слоўнік
Ня рвіся к багатым
Ці пойдуць пажары, хваробы пад стрэхі,
Ці голад, ці холад, ці смутак у хаце, –
Ня йдзі да палацу шукаці пацехі! –
Там толькі пачуеш зласьлівыя сьмехі.
Ой, раю – ня рвіся к багатым, мой браце!
 
Ня рвіся к багатым ты, доляй убогі,
Ня нойдзеш сэрц братніх, дзе толькі багацьце!
Там будзеш сабой выціраці парогі,
Табе, як сабацы, косьць кінуць пад ногі...
Дык слухай! – ня рвіся к багатым, мой браце!
 
Багаты гуляе, адзеты і сыты,
Багатаму цэлы век сьвята па сьвяце, –
Ты ж вечна працуеш, век потам абліты!
Дык будзь чалавекам, бо ты ж не забіты!
Падшэптаў багацьця ня слухай, мой браце!
 
[Да 7(20).IV.1906]
 
 
 
 
Падабаецца     Не падабаецца Водгукі
2009–2019. Беларусь, Менск.