Ясьнейшы за сонца, цяплейшы за сонца, і радасьць, і роднасьць, і боль мой бясконцы!.. Будзь, сынку, зь людзьмі – нібы ласка жывая, што ўсіх разумее, усіх сагравае. Ня знай чужой крыўды і страху ня знай, замест ненавідзець – ты шчыра кахай. Пі мудрасяць з жыцьцёвых крыніцаў і з кніг, умей сабе верыць, жыві для другіх. Лячы, як умееш, вучы так, як можаш, бальзам у цярпеньні, маяк ў бездарожжы. Хай рук тваіх сіла ніколі ня згіне, будзь хлебам галодным, вадой у пустыні. Убачыш плаксівага – сьлёзы сатры, пагладзь – не удар, і лепш дай – не бяры. Ня крыўдзь слабасільных і крыўдзіць ня дай, ад сэрцаў самотных тугу адганяй. Шануй сваіх бліжніх, малодшых і старшых, будзь радасьцю іхняй, іх песьняй, іх маршам. Тваё застаецца хай чыстым сумленьне, а сілай хай станецца праўды праменьне. Будзь быстры, як ястраб, і хуткі, як леў, калі б тваіх брацьцяў хто крыўдзіць пасьмеў. Глумі ўсё ліхое, жыві для дабра, пі кару напарсткам, а ласку – зь вядра! А золата кінуць – прайдзі па ім горда пад думаў арліных жывыя акорды. Для тых, хто бяз сэрцаў, будзь сьцюжай зімовай, умей бачыць праўду, вер чынам, ня словам. Будзь цьвёрдым, як камень, у чорныя дні, прад сільнымі сьвету галоўкі ня гні. Май слова – як іскру, а мысьль – як крышталь, а сілу – як выстрал, а волю – як сталь! Май сэрца дзіцяці, любі свой народ, будзь прыкладам брацьцям, будзь бацькам сірот, у пекле – анёлам, ня толькі ў раю... Я людзям для шчасьця цябе аддаю!
|
|