Імжа і сонца – сэрца перапады. Абвал дажджу, то ветру грозны сьвіст. А золата таго, што лістападу: О залаты, сьляпучы падаліст! У лістападзе золата згараю, Нясу разладу яблыкі ў кашы. I свой жаночы розум дакараю За ціхую расслабленасьць душы. Ня бойся, сэрца, тут няма нікога. Пяе сасна. Шуміць сівы быльнёг. А гэтая пясчаная дарога Азалаціла з галавы да ног! Шуміце, дрэвы вечнасьці, зьвініце! Па таліі мне сьцежкі паясок. I як дзіця, адчуўшае адкрыцьце, Перабіраю залаты пясок.
|
|