Палын і чарнобыль – Браты з даўніны, На пусташах і на руінах Трывала карэньне пусьцілі яны Тубыльцамі ў родных краінах. Сьвятлейшы ўспамінам Палын-славянін, Чарнейшы чарнобыль-татарын, Адзін ласкавеў ля балючых былін, Другі суравеў ля выгарын. Яны – пагарэльцы І сьведкі вайны – Па сьвеце вандруюць спрадвеку. Іх лічаць сваімі паны-дзірваны, Адводзяць ад іх небясьпеку. Сівее ў сухмень, Серабрыцца палын, У лівень рунее маўкліва. Здаецца, чарнобыль Чакае свой клін, Што зь неба прывабіла ніва. Палын і чарнобыль, І мне вы – радня, Браты па малечай галечы. Пясчанай каплічцы апошняга дня Вы глуха атуліце плечы.
|
|