Дагэтуль смутак галадае, Як змрок, Ня знашчаны сьвятлом. Часьцей прыгадваю з гадамі, Як ела мама. За сталом Яна падоўгу не сядзела, А несла да стала, Была Каля стала. Імгла радзела. Дзень белы Мыўся дабяла. А на двары абрыдлы статак Штодзённай пільніцы Рыкаў, Капрызна тузаў за рукаў, Як той малеча, недастатак. Падмазкай мазала аладку, Бо масла згасла, Малако Далёка зьехала. Букатку Пякуць спрадвеку па дастатку. А ці аблуплена яйко, Лянько чакае. Жартам ласым Заскварваўся нішчымны дым, Што зь місы віўся самапасам, І сьмех быў з жыватом пустым. – А журавелькі паляцелі, З сабой палудзень панясьлі, – Казала мама. Карацелі, Як дні, запасы. Жураўлі Да нас сініцу слалі ў госьці, Каб зябла гэтак, як і мы, Каб скрасіць кропляй прыгажосьці Галоднасьць холаду зімы. Дагнаць хацела Мама лета, А на бягу ўсё, на хаду. І толькі смагла – Помню гэта – Піла сьцюдзеную ваду. Бо ў прыпары, Бо на сьпякоце Пастушкай, Жнейкаю, Касцом Насьмяглася – Каб кропля ў роце! – Лёс поўным Абышоў карцом. Гады свае бароды Бела, Як старцы, Сушаць на кіях. Прыпомніць не магу ніяк, Калі спакойна Мама ела...
|
|