Дзень залаты
Цёплым сонцам заліты,
Лётаў матыль
Сінякрылы над жытам.
Лётаў, як сон,
Над калосьсямі нізка,
Як перазвон,
Над малою калыскай.
Сьлёзы мігцяць
Ад тугі і бясьсільля, –
Хоча дзіця
Дакрануцца да крыльляў.
Маці-жняя
Пацяшае малога:
– Доля твая
Яшчэ сьпіць на дарогах.
Я вось дажну
Паласу, сіраціна,
I раскажу
Пра палёт матыліны.
Будзеш і ты,
Сынку, лётаць высока.
Вось зараблю
Я на хлеб табе, сокал.
1937
|
|
