Хто там едзе па Касову полю? Едзе ў полі дэлібаш адважны – Слаўны шэршань на жуку рагатым. Дзень ён едзе, і другі, і трэці, На чацьверты к мору пад’язджае, Што калюжай у людзей завецца. Затрымаўся, глянуў слаўны шэршань I такія словы прамаўляе: «Гой ты, коню, гой ты, жук рагаты! Ускарміў я, жук, цябе мятліцай, Успаіў я, жук, цябе расою. Саслужы жа верную мне службу – Пераскоч ты цераз гэта мора». I прамовіў шэршню жук рагаты: «Гаспадару, дэлібаш адважны! He скакаць бы мне з табой праз мора. He шукаць бы сьмерці перадчаснай. Як мы з хаты ранкам выязджалі, Гаварыла маці-шаршаніха, Што нядобры сон ёй ноччу сьніўся, Быццам пэрлы ўсё яна нізала. He іначай – будуць ліцца сьлёзы». Засьмяяўся шэршань, гэтак кажа: «Стаў ты, коню, бабай шумадзійскай! Я з маленства сьмерці не лякаўся, He збаюся і цяпер напэўна». I паслухаў шэршня жук рагаты. Разагнаўся, напружыўся моцна, Скакануў ён – і сягнуў праз мора, На высокі яр якраз патрапіў! I сарваўся заднімі нагамі Жук рагаты зь яру – аж у мора, 3-пад капытаў паляцела гліна; Ды скакнуў ён – і адратаваўся. Вось які быў гэты слаўны шэршань, Ды і конь той – чорны жук рагаты! Але шэршню ўсё яшчэ замала. «Гой ты, коню, – кажа, – верны коню! Мы скакнулі перадам праз мора, Дык скакнём жа празь яго і задам». I паслухаў шэршня жук рагаты: Разагнаўся, напружыўся моцна, Скакануў ён – ды у час нядобры! Грымнуў з вышы, небарака, ў мора, Ў сіне мора разам з гаспадарам. Так прадчасна сьмерць сваю натрапіў Слаўны шэршань, дэлібаш адважны. He, нямашка ўжо такіх юнакаў.
1915
|
|