Нясуджаны, я так скажу аднойчы, Заглядваючы ў бездань, нібы ў дні: Міні мой дом, і голас мой, і вочы. Забудзь мяне. Яе – не абміні! Грахом узнагароджаны, закляты! Сьвяты, нібыта Юрый на кані, – Пі юны хмель, растрачвай грошы ў сьвята, А на яе хоць зводдаля зірні. Яшчэ зялёны дзень, яшчэ зялёны Разьбег вясны на маладым ствале. Зрывай апладысмэнты і паклоны, Тапчы пажар бясслаўнасьці, але, Калі сьвятло ад недаверу згіне, Нясьпешна прывітай яе сьпярша: Я так цябе чакала, што ў каліне Адбілася уся мая душа!
|
|