Ні парушынкі ў небе, ні дажджынкі, I мройна вішня пышная цьвіце. Яшчэ мая хада лягчэй пушынкі. Адкуль цяжар так сэрцайка гняце? Душыла смага, цалавала сьпёка. Маланка з громам зьвязвала канцы. Але не памірала ад апёкаў – Зацягваліся песьнямі рубцы. Жыцьцё, ты стэп, што выгарэў да краю, Дрыготкі ліст на восеньскім гальлі. I ўсё адно – цябе я абдымаю, I ўсё адно цябе я бласлаўляю За боль і рай на песеннай зямлі.
|
|