|
Ну сядай, сядай са мной, калі ласка, Навальніды песьня старая-старая. Слухай казку. Апошнюю казку. Яна на тваіх вачох памірае. Ў гэтай казцы яліны лапы схілілі. Візантыйскі захад у алым дыме... «Зялёная сарока кашку варыла, Зялёная сарока з дурнымі вачыма...» У кулінарную кнігу глядзела, Чухала патыліцу драўлянаю лыжкай, I дзеткі кашку да лыжкі зьелі, А нам з табой не далі ані крышкі. Ты сьмяесься? Такога няма на сьвеце? Ня сьмейся, любая, сьвет шырокі. Мы з табою толькі дурныя дзеці. Нам добра з гэтай чубатай сарокай. Сарокі розныя рэчы крадуць, I, можа, ў гнязьдзе яе, з золатам поруч, Ляжыць каханьне, сьвятло і радасьць, Што прынесла сарока з-за сіняга мора. Аддайце, сарока. Няма ўжо сілы. Яна ж не кахае мяне, хоць зарэжце. ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ ∙ Дай я цябе пацалую, мілая. А каша? Чорт з гэтай кашай, нарэшце.
|
|
|