|
350 8.Х.1985 г.
А поўня нас цямнечаю лякае, I дождж ільецца прама у душу. Сынок, я тэлефоннымі званкамі У «Хуткай» міласэрнасьці прашу. Якая ўсё-ткі ноч у нас даўгая, Ці зналі мы падобную калі? ...Прыехала адна, затым – другая, I трэйцяя – падмогі не далі. Міжволі тут успомніш і пра Бога, Калі твой тварык бледны і васьцёр. Вяду цябе зьнямоглага, слабога Праз хірургічны доўгі калідор. Было ў жыцьці маім зашмат благога I ўсё-ткі болей сонца і удач. Тулю цябе сьцішэлага, слабога, А ты мне шэпчаш: «Мамачка, ня плач». Так цяжка мне, нібы іду праз гурбы I завірухай сьвет завалакло. I ўжо малю ня Бога, а хірурга: «Ўратуйце мне адзінае сьвятло».
|
|
|