V. ЯНА І ЯНО Я: A melie_23 Я пазнала яго па майцы з царквой Санта-Крочэ. Ён меў новыя дыскі і (мусіць) пагляд васіліска, і таму я ўпарта глядзела яму ня ў вочы, а на пальцы, якія трымалі люстэрка дыска. З таго дня, як раней: хаджу басанож па гальцы, не ўстаю (па стане здароўя) пад гукі гімну, але гіну ад млосьці, ўявіўшы, як гэтыя пальцы набіраюць пароль найпякнейшага ў сьвеце лагіну. Ты: Eva Мужчынам, якіх ты чакала б, калі вайна, – імя Легіён; не таму, што амаль кожны год бывае вясна, а таму, што ў слухаўцы вецер і іх галасы, і, насуперак перасьцярогам пра шкоду паленьня, іх цыгарэтамі пахнуць твае валасы; калі заўтра вайна, ім пазаўтра ісьці ў лясы, бо яны па-свойму тлумачаць слова “сьцяна”, бо яны – партызаны, і гэта ў чацьвёртым калене. Яна: Penelopa Калі выкладаць, то яна хацела найлепшай клясы, калі гуляць – то ад сушы-бару да айрыш-пабу, калі ідэю – то фікс, і абавязкова ў масы, калі засіляцца – то пятлю пажадана зь ядвабу. Працэс, дзе яна пракурорам, адклаўшы зноўку, яна падпілоўвала шпількі варожым гейшам, ня думаючы пра тых, што сплылі ў вандроўку, і, як ні складана было, жыцьцё рабіла прасьцейшым. А па начох яна, распусьціўшы дазваньня сыстэму спрадвечных каардынатаў “уток-аснова”, няўмека, вярэдзіла пальцы ды ткала схему мэтрапалітэну свайго існаваньня нанова.
|