КАРОТКАЕ ПРАДМОЎЕ
Перш за ўсё хачу папярэдзiць чытача, што гэтая кнiга – твор вельмi iнтымны, суб’ектыўны, аднабаковы, якiм, зрэшты, цi не заўжды зьяўляецца мемуар, успамiн, сьведчаньне. Думаецца, у тым ягоная сiла, але адначасна i слабасьць, падстава для прэтэнзiяў i нязгоды. У сваё апраўданьне магу толькi сказаць, што ня меў жаднага намеру каго-небудзь абразiць, што-колечы скрывiць цi знарок падаць у неадэкватным сьвятле.
Бальшыня названых у творы пэрсонаў прыведзеная пад iхнiмi сапраўднымi iмёнамi. Хiба ў асобных выпадках iмёны зьмененыя – зь меркаваньняў павагi да годнасьцi тых пэрсонаў ды i ў iнтарэсах аўтара. Наколькi тое магчыма, аўтар iмкнуўся прытрымлiвацца храналёгii, хаця тое не заўжды ўдалося. Асаблiва там, дзе падзеi адбывалiся паралельна або выпадалi з пэўнага лягiчнага ланцугу.
Выбачаюся перад тымi, каго не ўпамянуў тут, пра каго напiсаў мала цi тым болей ня так, як яны заслугоўваюць. Перад тымi, каго засмуцiў названымi фактамi або празьмернымi азначэньнямi. Знарок нiкога не хацеў пакрыўдзiць. Прабачце мне!
Аўтар
|
